“Dolzarb 40 kunlik” doirasida Chinoz tumani mahallalarida o‘rganish ishlari olib borilmoqda

31.07.202651

O‘zbekiston Respublikasi Prezidenti tomonidan belgilab berilgan aholi bandligini ta’minlash, kambag‘allikni qisqartirish, tadbirkorlikni rivojlantirish hamda mahallalarda iqtisodiy faollikni oshirishga qaratilgan ustuvor vazifalar ijrosini ta’minlash maqsadida e’lon qilingan “Dolzarb 40 kunlik” doirasida joylarda tizimli ishlar davom ettirilmoqda.

Mazkur jarayonlarda Xalq bankiga biriktirilgan respublika vakillari Chinoz tumanidagi ko‘rsatkichlari past bo‘lgan “Avg‘on” va “Chorvador” mahallalarida bo‘lib, ishsiz hamda kam ta’minlangan oilalar bilan uchrashuvlar o‘tkazdi.

Uchrashuvlar davomida fuqarolarning mavjud muammolari, kasbiy qiziqishlari va bandlik imkoniyatlari o‘rganildi. Shuningdek, ularni doimiy ish bilan ta’minlash, oilaviy tadbirkorlikni yo‘lga qo‘yish, imtiyozli kreditlar va bank xizmatlaridan samarali foydalanish orqali daromadlarini oshirish yuzasidan zarur tavsiyalar va tushuntirishlar berildi.

Xalq banki tomonidan aholi bandligini ta’minlash, tadbirkorlik tashabbuslarini qo‘llab-quvvatlash hamda fuqarolarning daromadlarini oshirishga qaratilgan manzilli ishlar izchil davom ettirilmoqda.