Kredit tarixi nima?

18.07.20221 661

Kredit tarixi fuqaroning banklar, mikrokredit tashkilotlari, lombardlar, lizing kompaniyalari va maishiy texnika, mebel va shu kabi do‘konlarning kredit xizmatlaridan foydalanganligi toʻgʻrisidagi maʼlumotlardir.

Kredit tarixida fuqaroning qaysi kredit tashkilotidan, qancha miqdorda qarz olgani, keyinchalik uni qanday to‘lagani to‘g‘risida batafsil ma’lumot aks etadi.

O‘zbekiston Respublikasining “Kredit ma’lumotlari almashinuvi to‘g‘risida”gi Qonuniga asosan kredit tarixi qarzdorning so‘nggi besh yil ichidagi majburiyatlari to‘g‘risidagi ma’lumotlarni o‘z ichiga olib, quyidagi ma’lumotlarni aks ettiradi:

qarzdor to‘g‘risida;

joriy va yopilgan kreditlar, tovar kreditlari qiymati, rasmiylashtirilgan sanasi, muddati va qoldig‘i to‘g‘risida;

muddati o‘tgan qarzdorliklar to‘g‘risida;

joriy va yopilgan kreditga qo‘yilgan garov mulki va mulk egasi to‘g‘risida;

sud jarayonidagi kreditlar to‘g‘risida;

kredit tarixi shakllangan sana va uni tayyorlagan tashkilot to‘g‘risida.

Shu bilan birga, kredit tarixi qarzdor to‘g‘risidagi ma’lumotlardan tashqari lizing oluvchi, kafil, kafolatchi, garovga qo‘yuvchi hamda kredit bitimi bo‘yicha sug‘urtalovchi sifatida qatnashuvchi jismoniy va yuridik shaxslar to‘g‘risidagi ma’lumotlarni ham o‘z ichiga oladi.